TURA: West Garo Hills a·jani a·kawe jolrango Assam-ni manderang niam gri dokkanrangko chalaienga ine rim·a man·ani ja·man, ia biaprango Assam-oni dokkan dakgiparangko a·rikgalchina gita Garo Hills Autonomous District Council (GHADC), a·a nokgiparangna ge·etaniko on·ataha.
Ia ge·etaniko GHADC-ni Joint Secretary II, West Garo Hills a·jani Hatogaon songo donggipa mande sakgittam, chong·motan Profulla Rabha, Dinesh Rabha aro Biharilal Rabha-na on·angaha.
Ge·etaniko on·anio GHADC official-ni parakatani gitade, ia biapo Assam a·dokni mande saksni, chong·motan Nurul Ali, Rofiqul Ali, Ashmod Sheikh, Mohammad Ali, Shajahan Sk, Sofior Rahman, Hanif Ali, Alom Sk aro Lalchand Sk minggipa manderang, niam gri dokkanrangko chalaiengachim.
“West Garo Hills a·jani Hatogaon B Mahal jolrango donggipa a·arango Assam a·dokni adita sak manderang niam gri dokkanrangko rike chalaienga ine ma·sina man·aha. Uni gimin ia dokkanrangko salsnini gisepon pe·galchina ge·etaniko on·enga aro ia ge·etaniko salsnini gisepo chu·sokatjagenchimode na·simangni kosako rakgipa ja·kuko de·gen,” ine GHADC-ni official, Hatogaon songni mande sakgittamna seachi u·iataha.