TURA: West Garo Hills a·jao lockdown-ko chu·gimik ra·galna gitade, tika su·aniko chu·gimik matchotatchengna nangenga ine Sukrobar salo West Garo Hills a·jani Deputy Commissioner Ram Singh parakataha.
West Garo Hills a·jao COVID man·giparang batroroengani gimin gittimtangtango songdongenggipa manderangko tika su·e ra·china didina gita Sukrobar salo, West Garo Hills a·jani Deputy Commissioner Ram Singh, Tura Municipal Board, Executive Magistrate-rang, District Medical & Health Officer, District Immunisation Officer, District Disaster Management Authority (DDMA), dingtang dingtang mondolini dilgiparang, COVID management committee-rang aro Tura-o COVID-ko warachakna kam ka·enggipa chadamberang baksa DRDA hall-o tom·e chanchirimangaha aro ia tom·anio ua jinmana aganprakengon, manderang skango gitan janggi tangpiltaina man·na gita ta·raken tika su·aniko matchotatna nangengani gimin aganangaha.
Joltangtango songdongenggipa manderangko tika su·e ra·china didina nangengani gimin dingtang dingtang gittimni development committee-rangna didianiko on·angskaengon, West Garo Hills a·jao lockdown-rangko chu·gimik ra·gale bazar anti cha·anirangko, skul-college-rangko aro olakkiram nokrangko kulipiltaina man·na gita ta·raken tika su·aniko 100 percent gapatna nangenga ine Deputy Commissioner parakataha.
Tura jillani wilwilao tika su·mangimin gittim aro jolrangni gimin toe aganangengon, dingtang dingtang cholrangko ra·gate gittimtangtangni manderangko tika su·na didichina aro manderangko tika su·na didianio chadambe aro me·chik dolrangkoba bak ra·atchina ua dingtang dingtang gittimni dilgiparangko, Covid Management Committee-rangko aro mondolini dilgiparangko didiangaha.