SHILLONG: Bristibar saloni Sukrobar salona konta 24-ni gisepo Meghalaya a·dok gimiko sak 569 manderang COVID-19-ko man·daptaiaha aro apsan salon sak 11 manderang COVID man·e siangdapaha.
Sukrobar salo COVID-19 man·dapgipa sak 569 manderangko channe da·o Meghalaya a·dok gimiko COVID-19 man·e dongenggiparang gimik sak 5791 gapengaha aro ia apsan salon mande sak 11 COVID-19 man·e siangdaptaiahani gimin a·dok gimiko COVID man·e sianggiparangara gimik sak 1073 gapskaengaha.
Sukrobar salo positive ong·gipa sak 569 manderangoni sak 6-de East Garo Hills-o, sak 22-de East Jaintia Hills-o, sak 237-de East Khasi Hills-o, sak 11-de North Garo Hills-o, sak 77-de Ri Bhoi a·jao, sak 9-de South Garo Hills-o, sak 9-de South West Garo Hills-o, sak 20-de South West Khasi Hills-o, sak 67-de West Garo Hills-o, sak 39-de West Khasi Hills-o aro sak 72-de West Jaintia Hills a·jao ong·a.
Konta 24-ni gisepo COVID man·e sianggipa sak 11 manderangoni sak 7-de East Khasi Hills-o, sak 2-de Ri Bhoi a·jao, sak 1-de East Garo Hills-o aro sak 1-de West Jaintia Hills a·jao ong·a.
Ia apsan salon gimik sak 517 manderangde Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 57,450 gapskaengaha.