WGH-ni a·arangko Assam-chi man·chapengako nirokatchina GSMC, CM-na sedoa

TURA: West Garo Hills a·jao donggipa, Raksamgre (Civil) Sub-Division-ni ning·o ga·akgipa a·kawe jolrangni a·arangko niam gri Assam, Goalpara District-chi man·chapatengani a·sel a·dok damgnini sima-ari jolo donggipa manderang a·ani gimin kajia golmal ong·engako ta·raken namgrikatpile on·china gita Pedaldoba Regional Unit-ni Garoland State Movement Committee (GHMC)-ni dilgiparang mejalo Meghalaya Chief Minister Shri, Conrad K. Sangma-na memorandum on·angaha.
GHMC-ni dilgiparangni CM-na sedoatgipa memorandum-o janapani gitade, Assam-chi man·chapatenggipa a·arangara skangonin Meghalaya-ni a·arangsa ong·a, maina Meghalaya-ni Forest Beat Office-an uno dongachim ine nikna man·a. Uarangna agreba Garo Hills Autonomous District Council (GHADC)-ni map-on ua a·arangko Meghalaya-nin ine mesokahachim.
Assam-ni manderang Garo Hills-ni bakrobatgipa Jinjiram chibima chisam jolo donggipa a·arangona napdrabae Assam-ni bak dakatenga, jeon uamangni a·a ra·sekenggipao Rongsai, Signboard aro Kurung songrangkoba man·chapangengaha ine nikna man·aha.
Indake ong·engon, Kurung aro je songrangkon Assam-chi man·chapatna miksonganio niam gri Assam-ni manderang Meghalaya-ona napdrabaengani a·selo songni manderangna namen neng·nikani aro jajrenganirang sokbaskaenga ine GSMC, Pedaldoba Regional Unit-ni chairman Rimjen Ch. Sangma koborna seachi u·iataha.
Uandake, Meghalaya-ni a·arango Assam-chini niam gri napdrabae songdongenggipa manderang, songni lekka-patrorang jekai Voter ID aro uandake gipin lekkarangkoba Assam aro Meghalaya a·dok damgnionikon tarie ra·skaenga ineba Sangma-ni CM-na on·anggipa memorandum-o janapataha.
Sangmani parakani gitade, ia ong·enggipa obostarangni bidingo re·anggipa bilsio a·dok damgnini Deputy Commissioner aro Raaksamgre Civil Sub Division-ni SDO mang apsan nirokahachim, jeon GHADC-ni Revenue Department-ni official-rangba dongchapaha.
“Uamang Rongsai bajarona dipet re·roroe niangtokaha aro Forest Official-rang-ni mikkangon a·ja ba jolona niam gri napdrabae nok rike rotokenggiparangko dondipatangahachim. Indiba ua jolrango da·ona kingkingba niam gri napdrabae, nok rikengako nikna man·kuenga, jeni giminan da·o dipet a·dok sorkari maming ja·ku de·kujaengani a·selan mikkangchi Kuring songni manderangna namen jajrengchakna nangmanchaenga,” ineba Sangma parakataha.
Unigimin mikkangchi sima-ari jolo songdonggipa manderangni nanggrikaniko champengsona, aro manderangni neng·nike songsalo janggi tangaoniko chel·atna gita ia mamlarangko ta·raken niroke kamko ka·achi namgrikani cholko ra·bae on·china gitaba, GSMC-ni dilgiparang Meghalaya CM-ko mol·molataha.