SHILLONG: Bharatiya Janata Party (BJP) dol, a·songni manderangko cha·boke sorkariko chalaienga ine Robibar salo, a·doko Opposition Congress dolni dilgipa Mukul Sangma matnangataha.
BJP dolni ‘Achhe Din’ ine ku·chakgipa kattarangko jegalatengon, ia pilakan BJP dolni vote-rangko man·na cha·bokanisan ong·aia aro manderangko togianiara a·songni kosako chakatani gita ong·enga ine Sangma parakataha.
Meghalaya a·doko Congress dolko bon·ate, Congress dolni biaprangko BJP ra·skana man·gnok ine BJP-ni national general secretary Arun Singh aganahani gimin, Congress dolni dilgipa, ia kattarangko parakatskaaha.
BJP-ni dilgipana aganchakaniko on·angskaengon, 2023 bilsini Meghalaya Assembly election-o BJP dol seat ge·sakoba chena man·jawaha ine Sangma parakataha.
“Garo Hills-osan ong·aijawa indiba Shillong-oba BJP dol, seat ge·sakoba chena man·jawa,” ine Sangma, ka·dongbee aganaha.
Meghalaya a·doko BJP dol sorkariko rikna man·genchimode minute bongani gisepon Inner Line Permit (ILP)-ko ra·gate on·na man·aigen ine adita salrangna skang a·doko BJP-ni Minister Sanbor Shullai-ni agangipa kattarangna aganchakaniko on·angskaengon, “Bah Sanbor-ko angaba aro na·aba namen ma·sia aro BJP dolni kam ka·ani bewalko an·ching pilakan ma·sia. Uamang maibani gimin aganna gita dingtang dingtang manderangko jakkalgen. Ian uamangni cha·bokronggipa kamsan ong·aia,” ine Congress dolni dilgipa aganaha.
BJP-ni kamko manderangan nambate ma·sigiparang ong·a ine janapatengon, uamangni cha·bokanirangko mitam manderangde bebera·rongaia ine Sangma parakataha.