SHILLONG: Meghalaya College Teachers Association-ni bilsi sotbonga gapaniko gisik ra·e Sonibar salo online gita tom·bimonge manianiko oprakangaha. ‘‘Batanggimin salko manie mikkangchina teng·suaniko on·na’’ ine bilsini pangchakaniko MCTA-ni President Dr. (Ms) B.H. Buam Golden Jubileeko maniani salo parakaha. Unbaksana, da·alo mongsonggipa maniani salo Association-ko bikotgipa memborrangni batanggimin salrango dangdike on·gipa kamrangko aro ja·gamrangko an·ching nipilate da·alo skiani kamrangko ka·enggipa sakantian uamangni kamrangko skie ra·e chasong aro gadangrang dingtangani kri mikkangchina teng·sudapaniko on·na gita ja·ku de·na ineba ua pangchakani miksonganiko talate on·angaha.
Lakmen Rymbui, a·dokni Education Minister manianio mongsonggipa sokgipa ong·aha. Sajinma sabisini obostarang namjaengani a·selo Association-ni mongsonggipa manianiko dal·e maniaoniko champengaha ine duk ong·e parakaha. Indake, obostarang namjagenchimoba online mode-o manianiko dakani gimin kusi ong·e rasong on·a baksana college-o skienggiparangko, an·tangtangni daitoko kratcha·gija mikkangchina re·bae an·tangtangni daitoko sorkari baksa sualgrike kam ka·china gita didiangaha.
Bilsisa atana kingking sajinma sabisini salrango chatro-chatrirangna skianiko dakanio skigiparang namen neng·nikaniko man·enga ine janapa baksana gitalgipa cholko bikote chatro-chatrirangna skianiko dakchina gita skigiparangko mol·mole aganangaha.
Maniani somoio, mongsonggipa sokgipa Association-ni Golden Jubilee maniani dakanio jakkalna gita gisik ra·na kragipa logo-koba oprake on·aha.
Rajya Sabha-ni Member of Parliament Dr. W.R. Kharlukhi-ba manianio mande ra·ako man·a kragipa sokgipa ong·e bakko ra·aha. Indake, a·dokni jakgitelani bilsi sotbonga gapaniko gisik ra·na gita lekka kingsako chapa ka·na sorkarini chanchianikoba ua parakaha. Unbaksana, Association-o donge office-bearer-ni kamko ka·an salrangko gisik ra·e jinmana aganaha.
