SHILLONG: Garo Hills-o denggu dakgipa ba bobil dakgipa dolrang toprimna chanchitaienga ingipa koborko batanggimin ja 2-3 mangonin koborrangko man·soengjok ine West Garo Hills SP Vivekanand Singh aganaha.
Garo Hills-o bobil dakgipa dolrang chadengtaina ba nakattaina am·engjok ine Opposition dilgipa Dr Mukul Sangma re·anggipa Robibaro mangmangsan aganahachim aroba iani bidingo sorkariko niatchina gitaba Dr Sangma, Sorkariko aganahachim.
“Chinga koborrangko man·soenga aro iani bidingo chinga kamkoba ka·enga aro ia nakatbaenggipa bobil dolko bon·atchina gita Sorkari aro uandake police headquarter-oniba chinga u·iataha,” West Garo Hills SP aganaha.
Darang bobil dolkoba Garo Hills-o bikottaina chol on·jawa aro mija mangmango Ri-Bhoi district-oniko silchidarerangko man·gipaba uarangni bakrengsian ong·a, SP aganaha.
Ia denggu dakgipa manderang, mande rim·gittangani aro ra·seke ra·anirangko dakenga, indake pilak koborrangkon West Garo Hills police bimchipe ra·enga aro a·dokko skang gita bobil dolrangchi sin·jetako man·aona sokatna on·jawa, Tura SP aganaha.
Ua indakeba aganaha, da·omitingo je denggu dakgipa manderang bobil dolko bikotna miksongengachim, uamangara dosi dakani gimin criminal case ba dosi segatako man·giparang ong·a, jemangan maming nisan gri dolko kulina am·enga.
Unaskango, Dr. Mukul Sangma indake aganahachim je, bobil dakgiparang dol dakengaha aro silchidarerangko ra·e roramenga.
