TURA: Robibar pringo, North Garo Hills a·jani Mendal songo bilsi 27 ong·gipa mande saksako ka·saninggija dake so·ote galanina police-rang, mande saksako rim·na man·aha.
Koborko on·ani gitade, dos dakgipa Sengkubirth Ch Marak-ko North Garo Hills a·jani police-rang, Robibar walni 9:30 bajimango Tapa Darenchi song samba joloniko rim·na man·aha.
Robibar pringo Mendal songni Daniel Marak minggipa mande saksako uni nokpanteo, ka·saninggija dake so·ote galangani ja·man, songni mande manderang uni sigimin manggisiko nikenba Bajengdoba police station-ona u·iatahachim. Koborko man·soani ja·man bakan police-rang ua biapona re·ang sigimin mandeni manggisiko rate nina gita Mendipathar PHC-ona watataha aro police-rang Robibar salon, ia mandeko so·otanio jak donggipa manderangko sandina a·bachengaha.
Robibar salgimik police-rang, ia a·selni bidingo am·sandienba, walni bako dos dakgipa mandeko Tapa Darenchi songni ning·o donggipa Bolpuma joloniko rim·na man·aha ine kobor on·aha.
Ia mandeko rim·ani ja·man uni, mandeko so·otanio jakkalgipa motorcycle aro mobile phone-koba man·aha.
Dos dakgipa mandeko police-rang sing·sandion, ua so·otako man·gipa mande baksa meligrikgijanirang dongani gimin so·otaha ine police-rangna ku·rachakaha.
Ia mandeko uni so·otna jakkalgipa attekoba police-rang ja·mano man·aha.
