TURA: Re·anggipa Sukrobar salo, Garo Hills Autonomous District Council-ni Executive Membor (EM) aro Naguapara-ni MDC Dhormonath Ch Sangma-ko kragija dake doka ine matnange FIR ka·doangani ja·man, Tura-ni BJP MDC Bernard N Marak-ni kosako inquiry-ko dakchina aro inquiry matchotsrangkujaskal kamoniko ra·galchina Meghalaya a·dokni National People’s Party (NPP) dabiangaha.
Koborko man·soani gitade, re·anggipa Sukrobar salo Tura constituency-na komibate tangka paisarangko chamenga ine matnangenba ja·mano GHADC-ni executive membor aro gipin official-rang baksa nanggrikani ja·man executive membor-ko kragija dake jak sokaha ine Tura-ni BJP MDC Bernard Marak-ni kosako FIR ka·doangahachim.
Indake ong·engon, GHADC-ni executive membor-ko dokani aro ku·wattogija kattarangko jakkale executive membor baksana gipin official-rangko saianiara Bernard Marak-ni skango uni bobil dake chakatgipa bewalkon mesoktaiani gita ong·aha ine NPP Meghalaya State unit matnangatenba, uni kosako ta·raken inquiry-ko dakchina aro inquiry-ko matchotkujaskal uko MDC ong·aoniko ra·galatchina dabiangaha.
“15th Finance Commission-ni ning·o Tura constituency-nan bang·bate tangka paisarangko chamahaoba, ua an·tangni constituency-na chame on·gipa tangka paisarangko chu·ongnikjae, GHADC-ni executive membor baksana official-rangni kosako kragija dakaha,” ine NPP Meghalaya State unit-ni general secretary Aldo A Sangma parakatenba, uni iandakgipa kamrangara saksa dilgipani namgipa gunko mesoka ong·jaha indiba uni skango bobil dake chakatmiting somoio jakkalgipa bewalrangkon mesokani gita ong·aha ine talatangaha.
Indake ong·engon, GHADC-ni Executive Membor saksako kragija dake jak sokahani gimin aro GHADC-o kam ka·enggipa official-rangko ku·wattogija kattarangchi sauahani gimin Pedaldoba-o dingtang dingtang dolrangni nangrime bikotgipa Joint Action Committee-ba Tura-ni BJP MDC Bernard Marak-ni kamko raken jegalataha.
“Bernard Marak saksa BJP-ni dilgipa ong·e aro Tura GHADC constituency-o seokako man·gipa membor ong·e iandake dilgipaskako jak sokani aro officer-rangko ku·wattogija kattarangchi sauaniara namen kragijani aro ra·chakna man·gijani ong·a. Chinga Pedaldoba-ni JAC, uni (Bernard)-ni kamko raken jegalenga,” ine Pedaldoba JAC-ni president Rimjen Ch Sangma parakataha.
