SHILLONG: Robibar saloni Sombar salona konta 24-ni gisepo Meghalaya a·dok gimiko sak 13 manderang COVID-19 man·e siangtaiaha aro apsan salon sak 350 manderang a·doko COVID man·daptaiaha.
Konta 24-ni gisepo COVID-19 man·dapgipa sak 350 manderangko channe da·o Meghalaya a·dok gimiko COVID-19 man·e dongenggiparang gimik sak 5843 gapengaha aro ia apsan salon mande sak 13 COVID-19 man·e siangdaptaiahani gimin a·dok gimiko COVID man·e sianggiparangara gimik sak 1109 gapskaengaha.
Konta 24-ni gisepo COVID man·gipa sak 350 manderangoni sak 1-de East Garo Hills-o, sak 12-de East Jaintia Hills-o, sak 197-de East Khasi Hills-o, sak 4-de North Garo Hills-o, sak 31-de Ri Bhoi a·jao, sak 3-de South Garo Hills-o, sak 7-de South West Khasi Hills-o, sak 37-de West Garo Hills-o, sak 25-de West Khasi Hills-o aro sak 33-de West Jaintia Hills a·jao ong·a.
Salsani gisepo COVID man·e sianggipa sak 13 manderangoni sak 7-de East Khasi Hills-o, sak 2-de Ri Bhoi a·jao, sak 2-de West Garo Hills-o, sak 1-de North Garo Hills-o aro sak 1-de West Khasi Hills a·jao ong·a.
Ia apsan salon gimik sak 537 manderangde Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 58,987 gapskaengaha.
