TURA: Garo Hills-o songdongenggipa manderangna aro mongsongbate chatro chatrirangni namgninasa miksonge North Eastern Hill University (NEHU) Tura campus-ko kulie on·ahachim indiba 2009 bilsimangonin ia campus-o maming namdapatanirang dongjae kam ka·enggiparang aro mongsongbate ia campus-o poraienggipa chatro chatrirang neng·nikanirangko chagrongna nangtokenga ine Garo Hills-ni dolbri NGO-rang, chong·motan GSU, AYWO, FKJGP aro ADE dolrang parakatenba, ia Tura campus-ko namdapatchina gita Shillong-o donggipa NEHU-ni Vice Chancellor-na sedoataha.
NEHU Tura campus-o kamrangko namdapatchina didiangengon, ia Tura campus-ni pro-vice chancellor-na Tribal-rangoni saksako songe on·china gita NGO-rang dabiangaha.
“NEHU Tura campus-na Tribal pro-vice chancellor-ko songani somoi ong·aha maina chingni ma·siani gitade Tura campus-ni financial aro administrative power-rangko da·o chu·gimik ra·galsrange ia campus-o maming bilrangko jakkalna man·jaengaha. Iandakgipa bilrangko Prof Singaiah-ni Pro-VC ong·engmiting somoio on·na kenchakenga ong·ode Tura campus-ko nambate chalaina gita Tribal Pro-VC-ko songe on·anian ong·enga. Uni gimin ia NEHU Tura campus-o joltangni manderangna nambate dangdike on·na man·na gita Tribal official saksako NEHU Tura campus-ni Pro-VC songe on·china chinga dabienga,” ine dolbri NGO-rang parakataha.
NEHU Tura campus-o assistant registrar sakgniko songe on·china gitaba NGO-rang dabiangaha.
NGO-rangni parakatani gitade, certificate aro mark sheet-rangko ra·na gita chatro chatrirang Shillong-ona songreangna nangengani a·sel neng·nikanirangko chagrongna nangtokengani gimin Tura campus-on certificate aro mark sheet-rangko on·na man·na gita bilko on·china uamang ru·uta somoirangna skangonin dabiengachim.
“NEHU Tura campus-ni assistant registrar sakgnioni saksa 2011 bilsio transfer ong·aha aro sakgipin 2012-13 bilsio kamoni neng·takangaha aro ua somoionin da·onan ia assistant registrar-ni biaprangko gapatkujaenga. NEHU Tura campus-ni deputy registrar baksa chinga agangrikon, assistant registrar saksande indita kamrangko ka·na amchakjaenga aro uko dakchakna gita sakgipin assistant registrar-ko nangenga ine chinga aganaha. Uni gimin kamrangko nambate ka·na man·na gita ta·raken Tura campus-o assistant registrar-ni kamrangko gapate on·china chinga dabienga,” ine NGO-rang, NEHU-ni Vice Chancellor-na sedoatgipa chittio parakataha.
NEHU Tura campus-ni department ge·antion regular dealing assistant-rangko songe on·china, senior assistant, deputy librarian, section officer-rangko songe on·china gitaba NGO-rang dabiangaha.
11th Plan-ni ning·o badita ge post-rangko sanction ka·ahachim, uarangni bidingo NEHU Tura campus-na u·iatchina gitaba NGO-rang dabiangaha.
NEHU Tura campus-o kamrangko nambate chu·sokatna man·na gita assistant engineer sakgniko songchina, regular system administrator-ko songchina aro section officer-ko kam ra·doate ba regular basis-o songe on·china gitaba dolbri NGO-rang dabiangaha.
Indake ong·engon, NEHU Tura campus-o kam ka·enggiparang pilakan nok parakosa ra·e dongtokna nangengani a·sel neng·nikanirangko chagrongna nangtokenga ineba NGO-rang parakataha aro kam ka·giparangna dongchakani quarter-rangko rike on·an baksana ramarangkoba tarie on·china aro namgipa ringani chirangko sale on·china gita, NEHU-ni VC-o dabiangaha.
