TURA: Central Board of School Education (CBSE)-ni ong·atgipa Class 12 porikkani result-ko parakatanio Williamnagar-ni Jawahar Navodaya Vidyalaya (JNV), chu·gimik pass ka·gopenba Garo Hills-na mikkim rasongko ra·baaha.
Da·o dipet Garo Hills gimiko JNV damgnisan dongkuengpiti aro Williamnagar-ni JNV-ba damsa ong·paengachim.
Williamnagar JNV-ni principal KK Mishra-ni u·iatani gitade, CBSE Class 12-ni Science Stream-o Thanori B Marak, 90.2%-ko man·e skanggipa position-ko man·aha, Sweety Hajong 88.4%-ko man·e gnigipa position aro Nitesh Kumar 86%-ko man·e gittamgipa position-ko man·skaaha. Humanity stream-o Pronali T Sangma 93.2%-ko man·e skanggipa position-ko man·skaaha, Eudia M Sangma 92%-ko man·e gnigipa ong·aha aro Chisaweara R Marak 89.4%-ko man·e gittamgipa position-ko man·skaaha.
Ia porikkao chu·gimik pass ka·gopahani gimin East Garo Hills a·jani Deputy Commissioner Swapnil Tembe-ba Williamnagar JNV-na an·tangni namgipa skaniko parakataha.
CBSE Class 12 porikkani result-ko re·anggipa July 30 tariko parakatahachim.