SHILLONG: Batanggimin konta 24-ni gisepon Meghalaya a·dokni dingtang dingtang biaprango sak 9 manderang COVID-19 man·e siangtaiaha aro uandaken a·doko COVID man·e sianirang komijaenga ine nikna man·a.
Re·anggipa Sombar saloni Mongolbar salona konta 24-ni gisepo Meghalaya a·dok gimiko sak 9 manderang COVID-19 man·e siangtaiaha aro apsan salon sak 556 manderang a·doko COVID man·daptaiaha.
Konta 24-ni gisepo COVID-19 man·dapgipa sak 556 manderangko channe da·o Meghalaya a·dok gimiko COVID-19 man·e dongenggiparang gimik sak 5574 gapengaha aro ia apsan salon mande sak 9 COVID-19 man·e siangdaptaiahani gimin a·dok gimiko COVID man·e sianggiparangara gimik sak 1118 gapskaengaha.
Konta 24-ni gisepo COVID man·gipa sak 556 manderangoni sak 6-de East Garo Hills-o, sak 11-de East Jaintia Hills-o, sak 196-de East Khasi Hills-o, sak 12-de North Garo Hills-o, sak 48-de Ri Bhoi a·jao, sak 7-de South Garo Hills-o, sak 28-de South West Khasi Hills-o, sak 85-de West Garo Hills-o, sak 92-de West Khasi Hills-o aro sak 65-de West Jaintia Hills a·jao ong·a.
Salsani gisepo COVID man·e sianggipa sak 9 manderangoni sak 5-de East Khasi Hills-o, sak 1-de East Jaintia Hills a·jao, sak 1-de West Garo Hills-o, sak 1-de West Jaintia Hills-o aro sak 1-de South West Khasi Hills a·jao ong·a.
Ia apsan salon gimik sak 816 manderangde Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 59,803 gapskaengaha.