TURA: 15th Finance Commission-ni ning·o Garo Hills Autonomous District Council (GHADC)-na aro mongsongbate Tura GHADC constituency-na chamatgipa tangka paisarangni bidingo jera ra·grikna gita Tura-ni MDC Bernard N Marak, GHADC-ni Chief Executive Membor (CEM) Benedic R Marak-ko ra·biataha.
15th Finance Commission-ni ning·o gong kror 1.57 tangkarangko Tura GHADC constituency-na chama ine agananiko Tura-ni MDC jegalenba, ia tangkarangko GHADC-ni chief executive membor aro gipin executive membor-rangni quarter-rangko taridapna gitasa chamskaaha aro tangkarangkoba nangana bate chamaha ine matnangengachim.
Iani bidingo jera ra·grikna gita GHADC-ni CEM-na sedoatengon, “Na·simangni Tura constituency-ni manderangna daka kamara namen ra·chakna man·gijani, mikkang niteani aro galchipna jotton ka·aniko mesokani ong·aha, uni gimin na·simang Tura-ni manderangna aganchakaniko on·na nangchongmota,” ine Marak parakataha.
Tura MDC-ni parakatani gitade, Tura constituency-na chamgipa tangkarangko CEM aro EM-rangni dongchakgipa official quarter-rangko taridapnasa chamskaaha aro quarter-rangko taridapna komibeoba gong lak 5-mangkosan nangaigenchim indiba quarter nokprakkon taridapna gita gong lak 20-mangko chamskaahachim.
“Na·simang Fifteenth Finance Commission-ni recommendation-ko pe·aha aro ia project-rangko an·tangtangni manderangna on·na miksonge joltangni MDC baksaba agangrikchengjaha,” ine Marak parakatenba, ia tangkarangko jakkalani bidingo CEM aro EM-rang baksa Council office-o jera ra·grikna ua ra·biataha.
“Jera ra·grikani sal aro somoiko na·simangni namnikani gita tik ka·china indiba na·simang tik ka·jagenchimode anga sal aro somoiko tik ka·skagen. Indiba jera ra·grikani matchotkujaskal, ia project-rangko dontongatchengchina ong·jaode ra·galsrangchina,” ine Tura-ni MDC parakataha.