TURA: West Garo Hills a·jani Raksamgre civil sub-division-ni ning·o Pedaldoba-oni Rabugong bazar-ona dakanggipa ramako taria matchotgija galchipe donenga ine Garoland State Movement Committee (GSMC) Pedaldoba regional unit, ia ramako tarigipa contractor-rangni kosako West Garo Hills a·jani Deputy Commissioner-na badi ka·doangaha.
Deputy Commissioner-na badi ka·doanggipa chittio GSMC Pedaldoba unit-ni chairman Rimjen Ch Sangma-ni parakatani gitade, Pedaldoba-oni Rabugong Bazar-ona dakanggipa ramako 2014 bilsio chi bananio pe·angahachim aro ia ramako taripilna gita 2017-18 bilsirangon gong lak 94 tangkarangko chamate, ia ramako matchotatna jasku somoiko on·ahachim.
“Ia ramako tarina sanction ka·aoni da·o bilsigni batpilengaha indiba ia ramani culvert damgniko da·onan matchotkujaenga,” ine Sangma parakatenba, ia culvert ge·praknan gong lak 4 ka·e tangkako chamatahani gimin culvert damgnio gong lak 8-de gimaengaha ine talatangaha.
Ia culvert-rangko matchotkujaengani a·sel office-rangchi re·enggipa manderang, skulrangchi re·enggipa bi·sarang aro dingtang dingtang nanga kamrangna re·ruraenggipa manderang neng·nikanirangko chagrongna nangtokengaha ineba GSMC Pedaldoba unit parakataha.
“Ia kamko ka·gipa contractor an·tangni kamko matchotatna gisiko nangjaenga aro kamko nirokgipa overseer-ba kamtangko ka·jaenga. Uni gimin ia contractor aro official-rangni kosako nanga gita ja·kurangko de·e kamrangko ta·raken matchotatchina chinga mol·molenga,” ine GSMC Pedaldoba unit-ni chairman parakataha.
Comments are closed.