TURA: West Garo Hills a·jao mikkarang waengani a·sel Sabilla-1 aro 2 baksana Singwilgre gita Jigabari-oni Gorband-ona dakanggipa rama nosto ong·ahani gimin da·o wachi dipetde, ia rama gita manderangko salruraenggipa bus aro truck garirangni re·ruraaniko champengatchengaha.
Phulbari-o donggipa PWD (Roads) official-rangni u·iatani gitade, ia rama gita pik-up aro tractor gita dakgipa garirang re·ruraani a·sel rama nosto ong·dapaha aro da·o ia rama gita garirangko re·rurana on·angkugenchimode Jigabari ramarang nosto ong·dapatako man·e re·ruraenggipa garirangna kenchakani ong·gen.
“Ia ramako nosto ong·dapaoniko chel·chakna gita da·o garirangni aro mongsongbate dal·dalgipa garirangni re·ruraaniko champengatchengna nangaha,” ine PWD official parakataha.