SHILLONG: Meghalaya aro Assam a·dokni sima arirango meligrikgijanirangko namatpilna gita Meghalaya a·dokni Chief Minister Conrad K Sangma, re·baenggipa August-ni 6 tariko Assam-ni Chief Minister Himanta Biswa Sarma baksa Guwahati-o agangriktaina siengani gimin Meghalaya a·dokna maming gimaani gri a·dok damgnini gisepo nangrimaniko ra·piltaina gita see rakkigimin lekkarango pangchakesa agangrikchina a·dokni Congress dol didiangaha.
Congress dolni MLA PT Sawkmie-ni parakatani gitade, a·dok damgnini gisepo meligrikgijanirangko namatna gita dolgni sorkarirangni agangrikaniara bilongen namgipa ja·ku de·ani ong·enga indiba ia meligrikgijaniko bakande namatpilna man·kujawa.
“Da·osa skanggipa changna chief minister-rangni gisepo agangrikengani gimin an·ching ia agangrikanioniko agre ka·donge nichakna gita nangja. Ia kamko salsani gisepode namatna man·jawa aro bewal somoiko nangkuaigen,” ine Sawkmie aganaha.
Assam a·dok baksa on·a ra·a dakgipa bewalo songgigrikaniko Congress dol ra·chakna man·chongmotjawa ine janapatengon, “Assam a·doksa Meghalaya a·doko napdrana jotton ka·enga indiba Meghalaya-ni manderangde Assam-o napdraenga ong·ja. Assam a·dok baksa on·a ra·a dakgipa bewalo songgigrikgenchimode Meghalaya a·doksa a·arangko gimaatna nange noksan ong·batgipa ong·gen,” ine Congress MLA parakataha.
Ia meligrikgijaniko Meghalaya a·dokni bilsi 50 gapaniko manina skang namatna man·gen ine manderangni bebera·aniara indinsa ong·gramaigen maina ia neng·nikaniko bakande namatna man·jawa ineba Sawkmie parakataha.
Adita salrangna skangsan Assam a·dokni Chief Minister Himanta Biswa Sarma-ba Shillong-ona re·bae ia neng·nikani bidingo Meghalaya a·dokni Chief Minister baksa agangrikangahachim aro uandaken da·o Sukrobar saloba a·dok damgnini chief minister-rang gnigipa changna agangriktaina siengachim.