TURA: Ia bilsini Secondary School Leaving Certificate (SSLC) porikkao Christian Girls Higher Secondary School-ni gipin jat chatri saksa Garo subject-o ‘Letter’-ko man·e A·chikrangna ra·bianiko on·angaha.
Ia chatrini bimingara Kriti Singh ong·achim aro ua Garo subject-o gimik 88 mark-rangko man·e ia bilsini SSLC porikkao teng·sugipa ong·aha.
Ia chatri, Garo subject-osan ong·aigija ming 5 subject-rango letter-ko man·aha aro ua gimik 86.33 percent-ko man·e ia porikkao chu·sokgipa ong·aha.
Ia chatrini Garo subject-o letter-ko man·ahani gimin skulo skigiparang aro dingtang dingtang dilgiparangba ia chatriko mittelpilataha aro una namgipa skanirangkoba on·attokaha.
“Gipin jatni Garo subject-o letter marks man·e pass ka·ania skulo poraienggipa A·chik chatro chatrirangnasan ra·biani ong·ja, dal·giminrangnaba ong·chongmota. Dal·giminrangoniba bang·an A·chikkuko tik ong·e sena skie ra·na nangenga,” ine Tura Christian Boys Secondary School-ni Principal SA Sangma parakataha.
“A·chik mande ong·jaoba A·chikkuko ku·jarikao dal·e ua A·chik ku·siko letter man·pile SSLC-o pass ka·ania an·ching ku·tangko agangipa manderangna ra·biani ong·chongmota. Kriti Singh-ni re·mikkange poraianio nama chu·sokani ong·angkuchina angni skani,” ine sakgipin skigipa Arcosh M Momin-ba social media-o parakataha.
