SHILLONG: Ia bilsi Independence Day ba Jakgitelani Salko maniani ja·mano Meghalaya Sorkari, A·doko educational institution-rangko kuliani gimin chanchinaba donga.
Independence Day-ni ja·manon Sorkari, A·doko college-rangko kulina on·ainaba donga ine ka·dongsoenga ine Education Minister, Lahkmen Rymbui aganaha.
“A·doko COVID tikkarangko su·ani da·o 50 percent mangde ong·engaha, aro tikka su·giparang bang·batangkugen ine ka·dongenga, maina da·ode salprakon sak hajal 10 manderang tikka su·tokenga,” ine aganan baksa, chinga chatro chatrirangni naljokaniko nangbata, unigimin class-rangko a·bachengatna skang namedake nigrikchenggen, Pa Rymbui aganaha.
Tikka su·achisan COVID-oni naljokna man·aigen aroba ong·rongbewal janggi tanganiona sokbana man·aigen ine u·ioba manderang mainan tikka su·na jajatokenga, ma·sina man·pilja ine aganan baksa tikkarangko su·e ra·enba poraianirangko dakna dedrangko aganchina gitaba Pa Rymbiu, ma·gipa pgiparangko didiataha.
Unaskang Sorkari, tikka su·ani report-rangko college-rangoniko am·atahachim, jeon 50 percent mang college-ni chatro chatrirang tikka su·mantokaha ine ma·sisona man·ahachim.
Indake ong·genchimoba health department aro daito ra·gipa manderang baksa agagrikaniko daka ja·mansa educational institution-rangko kulia ba kulijani gimin sorkari bon·kame chanchigen ineba Education Minister talataniko on·aha.
