TURA: Ia 2021 bilsini Secondary School Leaving Certificate (SSLC) aro Higher Secondary School Leaving Certificate (HSSLC) Arts porikkani result-rangko Bristibar salo Meghalaya Board of School Education (MBOSE) parakataha.
Ia bilsini SSLC porikkao West Khasi Hills a·jani Mairang St Thomas Higher Secondary School-ni Kevinstrong Lawriniang, 576 mark-rangko man·e Top 20-o skanggipa ong·aha aro Mookaiaw Sawlyngdoh Higher Secondary School-ni Wanteibok Pator, 575 mark-rangko man·e gnigipa ong·skaaha. Shillong St Mary’s Higher Secondary School-ni Khasish Samee aro Tura Sherwood School-ni Mridumay Saha sakgnian 574 mark-rangko man·e Top 20-ni gittamgipa biapko man·skaaha.
Ia bilsini SSLC porikkao Garo Hills gimikoni saksku chatro chatrirang, Top 20-o biapko man·rikaha aro uamangara, Tura Sherwood School-ni Mridumay Saha (3rd position), Phulbari Jawaharlal Nehru Higher Secondary School-ni Asif Zaman (5th position), Tura Sherwood School-ni Laxita Agarwala (8th position), Tura Sherwood School-ni Abigail Tiara R Marak (15th position), Pechon A Sangma Memorial Police Public Secondary School-ni Patiprata Ghosh (15th position), Tura St Xavier’s Higher Secondary School-ni Divya Binu Mathew (18th position), Tura Sherwood School-ni Harchelle R Sangma (18th position), Rongjeng Holy Family Secondary School-ni Bolgrim S Marak (19th position) aro private skul-ni Alra R Marak (20th position) ong·a.
Ia bilsini SSLC porikkako dam 630 skulrangoni gimik sak 64,269 chatro chatrirang seahachim aro ia sak 64,269 chatro chatrirangoni sak 34,003 chatro chatrirang chu·sokgipa ong·aha.
SSLC porikkao East Jaintia Hills a·jani pass percentage 85.09 percent ong·e a·doko bang·batgipa ong·aha aro South West Garo Hills a·jao 23.01 percent ong·e komibatgipa ong·skaaha.
SSLC porikkao district-ni gita pass ka·ani percentage-ranga East Garo Hills-o 35.10%, West Garo Hills-o 34.63%, South Garo Hills-o 27.50%, East Khasi Hills-o 71.97%, West Khasi Hills-o 58.28%, Ri Bhoi-o 62.40%, South West Garo Hills-o 23.01%, North Garo Hills-o 27.88%, South West Khasi Hills-o 70.78%, East Jaintia Hills-o 85.09% aro West Jaintia Hills-o 73.41% ong·aha.
Indake ong·engon, ia bilsini HSSLC Arts porikkao Shillong St Anthony’s Higher Secondary School-ni Daniel Ksanbor Khyriemmujat, 462 mark-rangko man·e Top 10-ni skanggipa biapko man·aha aro St Edmund’s Higher Secondary School-ni L Kennedy Vaiphei, 450 mark-rangko man·e gnigipa biapko man·skaaha. St Anthony’s School-ni Jethro Jarvis Roy Jyrwa, 449 mark-rangko man·e Top 10-ni gittamgipa biapko man·skaaha.
Ia bilsini HSSLC Arts porikkaode Garo Hills-oni saksaba Top 10-o biming nakatskajaha.
Ia bilsini HSSLC Arts porikkako dam 237 skulrangoni sak 25,683 chatro chatrirang seskaaha aro ia sak 25,683 chatro chatrirangoni sak 20,740 pass ka·skana man·aha.
HSSLC Arts porikkao West Khasi Hills a·jani pass percentage 92.91 percent ong·e a·dok gimiko bang·batgipa ong·aha aro South Garo Hills 54 percent ong·e komibatgipa ong·skaaha.
HSSLC Arts porikkao district-ni gita pass ka·ani percentage-ranga East Garo Hills-o 71.48%, West Garo Hills-o 69.33%, South Garo Hills-o 54%, East Khasi Hills-o 90.80%, West Khasi Hills-o 92.91%, Ri Bhoi-o 86.93%, South West Garo Hills-o 64%, North Garo Hills-o 69.97%, South West Khasi Hills-o 88.95%, East Jaintia Hills-o 92.83% aro West Jaintia Hills-o 81.02% ong·skaaha.