SHILLONG: Ia bilsio COVID-19-ni a·sel lockdown-rangko ra·gatna nanggenchimoba aro class-rangko internet gitasa ra·na nanggenchimoba bang·bata chatro chatrirangan SSLC porikkao chu·sokgipa ong·na man·ahani gimin a·dokni Education Minister Lahkmen Rymbui, an·tangni kusi ong·aniko parakataha.
Ia bilsio sak 64,269 chatro chatrirang SSLC porikkako seahachim aro ianoni sak 34,003 chatro chatrirang, 52.91 pass percentage-o chu·sokgipa ong·tokahachim.
Bilsiantian Meghalaya a·doko SSLC-ko pass ka·ani percentage 50 aro 60 percent-na batjaengani gimin sing·on, a·doko result-ko namdapatna gitade dingtang dingtang cholrangko ra·gatna nanggen ine Rymbui parakataha.
SSLC-ni result-rangko namdapatania sorkarini daitosan ong·ja indiba chatro chatrirang, skigiparang aro ma·a paarangni daitoba ong·enga ineba ua aganaha.
Re·anggipa bilsiode sak 26,000-mangni gitasan SSLC porikkao pass ong·na man·aiahachim indiba ia bilsiode sak 34,000-na baten chatro chatrirang pass ka·na man·aha ineba Education Minister, an·tangni kusi ong·aniko parakataha.
“COVID-ni obostarangchi chatro chatrirang porikkana name tarisamsotokna man·jagenchimoba uamang rakbee poraiaha aro chu·sokgipa ong·aha,” ine Rymbui aganaha.
Ia bilsioba Garo Hills-o pass ka·giparang komitaiahani gimin sing·on, Garo Hills-o pass ka·giparang komiengani gimin am·sandianirangko dakna gita sorkari, 2019 bilsion committee-ko songaha aro committee-ni report-ko re·anggipa bilsion on·aha ine Education Minister parakataha.
Ia report-o pangchake sorkari, kamrangko ka·na a·bachengatahachim indiba lockdown-ni a·sel skulrangko chipe donna nangengani gimin bang·bata kamrangkon ka·na man·kujaenga ineba Rymbui parakataha.
SSLC porikkao pass ka·gipa chatro chatrirangko Edu Minister mittelpila
Date:
Share post:
