TURA: Tura-oba teer kal·aniko a·bachengpiltaina on·engahani gimin COVID-19 batrikrikjana gita teer gochakgipa aro kal·chakgipa biaprang gimikon samrangko sate rongtalatjringchina aro COVID-ni giproroaniko champengna dongimin dingtang dingtang niamrangko ja·rikchina gita West Garo Hills a·jani Deputy Commissioner Ram Singh ge·etangaha.
Deputy Commissioner-ni ge·etaniko on·angani gitade, teer kal·chakgipa aro teer counter-rang pilakon somoirangko ja·rikna nanggen, kal·chakgipa aro dokkanrango jaksuani ba jak rongtalatani samrang dongna nanggen, do·gacholrangkoba samrangchi rongtalatna nanggen, tika su·a su·gijaniko see donna nanggen, saksa sakgipinoni chel·tanggrike donganiko ja·rikna nanggen, cigarette ba biri b ague aro uandakgipa bosturangko sualgrike jakkalna man·jawa.
Teer gochakgipa biapo teer goenggipa manderang pilakan tika su·gimin ong·na nanggen, teer goani bosturang, jekai chri, bra aro uandakgipa bosturangko sualgrike jakkalgija an·tangtangni jakkalna nanggen, goenggipa manderang sak 30-na batna man·jawa, gochakgipa biap ning·o maming dokkanrang dongna man·jawa, teer gogiparang kal·chakram biapo napna skang an·tangtangko rongtalatchengna nanggen aro teer goenggipa manderangko dingtangmancha chin dakna nanggen ine Deputy Commissioner u·iataha.
Teer kal·ani somoio chu ringani ba ma·manti pekatani bosturangko jakkalna man·jawa aro kal·ako nitimgiparangba sak 4 ba sak 5-na batna man·jawa. Brarangko chanengmiting somoio glove-rangko ganna nanggen aro teer kal·ani pilak kamrangkon 1:00 bajion chipna nanggen ineba Deputy Commissioner u·iataha.