GUWAHATI: Ru·utbea bilsirangna Assam aro Meghalaya a·dokni sima arirango meligrikanirangko namatna gitade dingtang dingtang cholrangkoba ra·na nangaigen ine Sukrobar salo Meghalaya a·dokni Chief Minister Conrad K Sangma parakataha.
A·dok damgnini gisepo meligrikgijanirangko namatna gita a·dok damgnini sorkarirang asonge agangrikengon, ‘on·a-ra·a’ dakgipa bewalkode gelna nanggen ine adita salrangna skang a·dokni Opposition Congress dol aganahani gimin a·dokni Chief Minister, ia kattarangko aganskaaha.
“Ia meligrikgijaniko namatna gitade an·ching lekkarangosan pangchake dongna man·jawa maina an·ching lekkarangko mesokode Assam-ba apsan daken lekkarangko mesokaigen aro uandaken ia meligrikgijaniko namatchipna man·jawa,” ine Sangma aganenba, a·dok damgnini gisepo meligrikgijaniko namatna gitade ‘on·a-ra·a’ dakgipa bewalkoba ja·rikna nangaigen ine parakataha.
Meghalaya Chief Minister-ni aganani gitade, kakketrangko sandiani ja·man a·dok damgnini gisepo meligrikgijanirangko namatna gita a·dok damgnini chief minister-rangan, dingtang dingtang cholrangko ra·na ku·rachakgrikaha.
Assam a·dok baksa ‘on·a ra·a’ dakgipa bewalo songgigrikjachina gita Meghalaya sorkariko didiangengon, “Assam a·doksa Meghalaya a·doko napdrana jotton ka·enga indiba Meghalaya-ni manderangde Assam-o napdraenga ong·ja. Assam a·dok baksa ‘on·a-ra·a’ dakgipa bewalo songgigrikgenchimode Meghalaya a·doksa a·arangko gimaatna nange noksan ong·batgipa ong·gen,” ine adita salrangna skangsan Congress MLA parakatahachim.
Re·baenggipa 2022 bilsio Meghalaya a·dokni bilsi 50 gapaniko manina skang sima arirango meligrikgijanirangko namatna man·genma ine sing·on, “Mikkang bilsio Meghalaya a·dok bilsi 50 gapaniko manina siengani gimin una skang simarangko name tarina man·genchimode nambatgenchim. Indiba angni agangimin gitan ia kamara altua ong·jawa indiba chinga ka·donge jotton ka·e nikugen,” ine Meghalaya Chief Minister parakataha.
Golmalko namatnade dingtang dingtang cholrangko ra·na nangaigen: CM
Date:
Share post:
