M’laya-Assam a·dokni simarango meligrikgijanirangko namatna CM-rang agangrika

GUWAHATI: Ru·utbea bilsirangonin Meghalaya aro Assam a·dokni simarango meligrikna man·jaengani a·sel sima jolrango songdongenggipa manderang neng·nikanirangko man·tokengani gimin Sukrobar salo a·dok damgnini chief minister-rang Guwahati songjinma tom·e agangrikangaha.
Ia tom·anio Meghalaya a·dokchipakni Chief Minister Conrad K Sangma, Deputy Chief Minister Prestone Tynsong aro gipin Cabinet Minister-rang, chong·motan Sniawbhalang Dhar, Lahkmen Rymbui, Renikton Lyngdoh, Banteidor Lyngdoh, Hamletson Dohling, Brolding Nongsiej, Sanbor Shullai, Dasakhiat Lamare aro Kyrmen Shylla bakko ra·eaha.
A·dok damgnini simarango meligrikgijanirangko namatpilna gita Chief Minister-ni gadango ia tom·aniko ong·atahani gimin Assam-ni Chief Minister Himanta Biswa Sarma-ko mittelpilangengon, a·dok damgnini gisepo meligrikna man·jaenggipa dam 12 biaprang gnang aro ia dam 12-oni damdok biaprangko skanggipa bako namatchengna gita a·dok damgnian ia tom·anio ku·rachakgrikaha ine Meghalaya a·dokni Chief Minister Conrad K Sangma parakataha.
“Ru·uta bilsirangonin a·dok damgnini simarango meligrikna man·jae jolo songdongenggipa manderang duk saknaanirangko chakna nangtokengahani gimin a·dok damgnini sorkarirangan ia meligrikgijaniko namatpilna nangnike da·alo apsan tom·e chanchirimangaha aro ia tom·anio chinga dolgni sorkarirangan, meligrikna man·jaenggipa damdok biaprangko namatchengna ku·rachakgrikaha,” ine Sangma parakataha.
A·dok damgnini gisepo meligrikna man·jaenggipa biaprangko dolgni sorkarirang, gadang gadang dake namatna tik ka·angaha ine talatangengon, skanggipa gadango a·dok damgnini gisepo meligrikna man·jaenggipa damdok biaprang, chong·motan Tarabari, Gizang, Hahim, Boklapara, Khanapara-Philangkata aro Ratachera jolrango meligrikgijanirangko namatna dolgni sorkarirang nangrime kam ka·anggen ine Sangma parakataha.
Ia kamrangko ka·dilna gita a·dok damgnian regional committee-rangko songgen aro ia committee-rangko a·doktangtangni cabinet minister-rang dilanggen ine talatangengon, ia committee-rang meligrikna man·jaenggipa biaprangona re·ange nienba da·o changgipin tom·anio report-ko on·anggen ine Meghalaya Chief Minister parakataha.
Sangma-ni parakatani gitade, a·dok damgnini gisepo changgipin tom·aniko da·o sal 30-ni gisepon Shillong-o ba Guwahati songjinmao ong·atangtaigen.
Indake ong·engon, ia damdok biaprango meligrikna man·gijaniko namatna man·ani ja·mano a·dok damgnini sorkarirangan, meligrikna man·jaenggipa gipin biaprangkoba namatpilna kamko ka·anggen ine Assam-ni Chief Minister Himanta Biswa Sarma parakatskaaha.
Da·o sal 30-ni gisepon a·dok damgnini sorkarirang, a·dok damgnini gisepo meligrikna man·jaenggipa Langpih jolrangkoba re·ange nianggen ineba Sarma parakataha.