SHILLONG: Manderang Bharatiya Janata Party (BJP)-ni kamrango suk ong·tokjaengahani gimin Congress dolan Meghalaya a·doko aro ma·mongoba bilona re·bapilgen ine Shillong-ni Lok Sabha MP Vincent Pala parakataha.
Congress dolko a·songni gipin biaprango bon·ataha gitan Meghalaya a·dokoba bon·atgen ine adita salrangna skang, BJP-ni national general secretary Arun Singh-ni Meghalaya a·dokona re·baani somoio aganahani gimin Congress dolni MP, ia kattarangko aganskaaha.
Meghalaya Legislative Assembly-o da·o dipet BJP-ni MLA sakgnisan dongaia aro mikkangchi ia biap damgnikoba Congress dolan ra·sekgen ineba Pala aganaha.
“Batanggimin bilsirango BJP-ni kam choligijaniko manderang nikmanaha aro uamang Congress dolni kamko nisusae mikkangchi Congress dolko seoktaigen,” ine Shillong-ni MP aganaha.
Pala-ni aganani gitade, BJP-ni dilgipa Arun Singh, salsa salgnina Shillong-ona re·bae mamingkoba ma·sichenggija Congress dolni gimin aganahachim.
BJP-ni gitcham minister AL Hek an·tangko cabinet-oniko ra·galakon ma·sijachim ine janapatengon, iandakgipa kamrangan BJP dolni gisepo meligrikgijaniko aro ku·mong nangrimani donggijaniko mesokani ong·enga ine Pala parakataha.
