SHILLONG: Meghalaya a·doko COVID-19 man·e sianggipa sak 1133 manderangoni da·o dipet 316 nokdangrangsan sorkarini gong 50,000 ka·e on·enggipa tangka paisarangko man·engkua aro bang·bata nokdangrangan death certificate-rang dongjae, nangchongmotgipa lekkarangko sorkarina on·na man·jaenga ine kobor on·aha.
CM Secretariat-oni u·iatani gitade, re·anggipa August 4 tarikona kingking Meghalaya a·doko COVID-19 man·e sianggipa sak 316 manderangni nokdangrangna uamangni bank account-rango gimik gong kror 1.58 tangkarangko chipataha.
Da·o dipet sorkarini on·enggipa ia ex-gratia payment-ko East Khasi Hills-o sak 142, North Garo Hills-o sak 15, South West Garo Hills-o sak 9, West Jaintia Hills-o sak 20, East Jaintia Hills-o sak 38, Ri Bhoi-o sak 37, South Garo Hills-o sak 26, West Garo Hills-o sak 26, East Garo Hills-o sak 2 aro South West Khasi Hills-o sak 1 man·aha.
West Khasi Hills-ode ia tangka paisarangko man·gipa nokdangrang dongskakujaenga.
Koborko on·ani gitade, a·jatangtango COVID-19 man·e sianggiparangko a·jani deputy commissioner-rang sandienba, sianggipa manderangni bidingo pilak u·ina nanganirangko chimongenga aro uandaken sianggipa mandeni jik ba se ba man·riknagipa mandeni bimingko aro uamangni bank account-rangko ia tangka paisarangko man·na gita Chief Minister-ni Secretariat-ona watatskaenga.
Indake ong·engon, hospital-rango COVID-19 man·e sianggiparangnaba Municipality-ni gitasa death certificate-rangko on·enga aro certificate-o siani a·selrangko janapani dongjani gimin bang·a nokdangrangan Chief Minister-ni on·enggipa ex-gratia payment-na dorgastorangko galpana man·jaenga ine kobor on·timgiparang u·iataha.
Iani bidingo talataniko on·angengon, hospital, PHC ba CHC-rango COVID man·e sianggipa manderangni death summary report-ni copy-rangko Incident Commander-rango ba Block Development Officer-rango man·gen ine sorkari official saksa parakatskaaha.
Death certificate-rangode maming saloba siani a·selrangko janaprongja ine talataniko on·angengon, sianggipa mandeni nokdang, death summary report-ko on·na nangchongmota ong·ja ine official parakataha.
Sorkari official-ni u·iatani gitade, ex-gratia payment-ko man·riknagipa sianggipa mandeni nokdang ba uni mandeni EPIC card, bank account aro uandakgipa gipin nanggipa lekkarangko BDO aro Incident Commander-rang, ra·e ja·mano District Disaster Management Authority (DDMA)-ona watatskagen.