GUWAHATI: Assam aro Meghalaya a·dokni simarango meligrikgijanirangko namatna gita a·dok damgnini sorkarirang ja·kurangko de·chakatengon, a·dok damgnini simarangko salpiltaina nanggenchimoba India a·songni Parliament-san sima arirangko salpiltaina man·aigen ine Sukrobar salo, Assam a·dokni Chief Minister Himanta Biswa Sarma parakataha.
Assam aro Meghalaya a·dokni sima arirango meligrikgijanirangko namatpilna gita Sukrobar salo a·dok damgnini chief minister-rang, Guwahati songjinmao tom·e agangrikangtaiahachim aro ia tom·ani ja·mano Assam a·dokni Chief Minister, kobor ra·timgiparangna talataniko on·angengon, a·dok damgnini gisepo meligrikgijanirangko namatna gita a·dok damgnini sorkarirang nangrime kamko ka·angchenggen aro a·dok damgnini sima arirangko salpiltaina nanggenchimosa ma·mong sorkarina u·iatgen ine parakataha.
“A·dok damgnini gisepo meligrikna man·jaenggipa damdok biaprangon dolgni manderangan an·tangtangni biap ine a·kangenga. Ia biaprango manderangni a·kanganirang baksana wa·reng salanirangkoba nipiltaina nangao ga·akenga,” ine Assam Chief Minister talatangenba, dolgnini gisepo agangrike kam ka·anirang chu·sokteljagenchimosa simarangko saltaina gitade dolgni sorkari chanchitaigen ine parakataha.
“A·dok damgnini agangrikanirang chu·sokteljaenga ong·osa aro ia simarangko saltaina nangtelenga ine nikgenchimosa chinga India sorkarina on·atna nanggen. Simarangko Parliament-san salpiltaina man·aigen,” ine Sarma parakataha.
