TURA: North Garo Hills, Bajengdoba sepango donggipa Mendal jolo namgijagipa mande chong·motan, (Black Man) ine potchipenba social media-rango jangbingbangatenba saksa mandeko so·otgipao jak dongpagipa mandeko konta 24-ni gisepon rim·a man·aha ine koborna parakataha.
North Garo Hills police-ni aganani gitade, Bajengdoba Police Station-ni ning·o ga·akgipa Mendal jolo batanggimin July 31 tariko ma·sina man·gijagipa manderang, denggu dakgipa ba mande namgijagipa ine potchipe mande saksako so·otahachim.
Ia a·sel obostani a·selan, social media-rango mande so·otgipa ba mande namgijagiparang walo walo roamenga ine ong·gija dake tol·e jangbingbangattokahachim.
Iani bidingo police-rang agan-talatengon, social media-rang gita tol·e jangbingbangatgipara kakket ong·ja. Iani bidingo Police Investigation Team am·sandie ra·aniko dakengon, dos dakgipa saksako konta 24-ni gisepon rim·a man·aha ine u·iataha.
Apsan mamlani bidingo tale-roke sing·sandie ra·angengon, dos dakanina police-ni jako rim·a man·gipa mande, uamangni dongnue dongimin kattarangko parakaha aro bang·a sakkirangko mesokahachim.
Indake ong·engon, North Garo Hills District Police, a·jani ramram manderangko iandakgipa ong·gijagipa kattarangko social media-rango tol·e jangbingbangatengako dal·e ra·jachina aro kenjagokjachina didiatjolaha.
Minggipin gita, Mendi-Soksan jolo ma·sina man·gijagipa sakbri manderang matsramgipa silchi-darerangko ra·bite walo walo roamenga aro uamangan Mongpangro songo mande saksakoba chadrapahachim, ine tol·e jangataha.
Uandake minggipin kattara, Pakmagre songo me·chikma saksako ma·sina man·gijagipa manderang walni somoio namgijagipa (soitanni gisik napgipa) ine potchipenba chadrapahachim, ineba tol·e jangataha.
North Garo Hills police-ni parakani gitade, ia minggittam obostarangan apsan somoion ong·aha social media-rango jangengani gimin manderangni gisikko kenjagokatna jujaatenga. Iani bidingo police-rang sandiroke ong·chongmotgipa obostarangko ma·siaha aro dos dakgiparangko ru·utgija salrangni gisepon rim·a man·gnok ine manderangko kenjagokjachina didiatan baksa ka·donganiko on·ataha.
