NONGPOH: Meghalaya a·doko, mongsongbate Ri Bhoi district-o chukalgipa gadango lekka-poraniko tang·doatna aro namdapatna miksonganio mikkang September jao nokdonggae on·a tarisamsoenggipa Ri Bhoi college-ni bipek gita Northern Ri Bhoi College ine biming donenba Diwon-o branch ge·sako kulinasienga ine koborna u·iataha.
Ia ong·chongmotgipa koborko Meghalaya sorkarini Chief Adviser, Dr DD Lapang mni Sukrobar salo, Ri Bhoi College -ni governing body Alpha English Higher Secondary School, Nongpoh-o tom·e chanchirimangani somoio parakataha.
Ua tom·anio Nongpoh MLA Mayralborn Syiem, jean sub-governing body-ni chairman-ba ong·engachim, unbaksa governing body-ni secretary, WK Blah, aro sub-governing body-ni adviser, RR Makdoh aro gipin chugipa gadangni official-rangba bakko ra·angpaaha.
Lapang, tom·ani ja·mano kobor ra·timgiparangna parakatengon, ru·uta bilsirangna skangoni Umden Nongtluh jolni manderangni nangnikenggipa aro niksamsoenggipa da·o Ri Bhoi College-ni bipekko a·bachengatna man·enganichi chu·sokgipa ong·na man·enga, jeon a·jani manderangna chukalgipa gadango poraia-skiani bidingo namgipa chol ong·batgnok ineba ua parakaha.
Uni kobor ra·timgiparangna parakatkuani gitade, college-ni bipek jekon Bhoirymbong-o kulina a·bachengengachim, uko Eastern Ri Bhoi College ine mingskanasienga, uko skangonin a·bachengatmanahachim.
Skang salrango, a·jani manderang jemangan chukalgipa gadango poraina nangnikengachim, uamang Nongpoh, Shillong aro uandakgipa gipin songjinmarangchi re·ongkatange poraina nangachim, indiba jensano ia college-ko a·bachengata, unon uamang a·jatangon poraina man·gnok, jean ma·gipa-pagiparangni korosrangko komiatskagnok ineba ua agandapaha.
Ua college-ko man·a kingkot kamko ka·enggiparangko mittellatengon, a·bachenge ua college-ko Arts stream-kosan kuliangchenggen, uni ja·mano ka·sinsin gipin stream-rangko a·bachengrorogen ine aganengon, da·ororo porikka pas ong·giparangna admission-rangko on·enga aro uamangni class-rangko dikdiksana Nongtluh Higher Secondary School-o ra·angchenggen ineba ua agandapaha.
