SHILLONG: Meghalaya a·doko Sohra-ko damgipin district songchina gita ua Meghalaya sorkari baksa agangrikgen ine BJP-ni MLA aro a·dokni gitcham Health Minister AL Hek parakataha.
Cabinet-oniko ra·galani ja·man Hek-ko adita salrangna skangsan Chief Minister Conrad K Sangma-ni advisor songskaahachim ine nikna man·a.
Indake ong·engon, Sohra-ko district songchina ku·pattie on·anian uni Chief Minister-na advisor ong·e skanggipa kam ong·gen ine BJP-ni MLA parakataha.
“Chief Minister-ni Advisor ong·e angni skanggipa kaman Sohra-ko Meghalaya a·dokni damgipin district songchina ku·pattie on·ani ong·gen. Ian namen dingtangmanchagipa biap ong·ani gimin district songna kragipa biap ong·enga,” ine Hek aganaha.
Sohra-ko India a·songni gipin bakrango aro gipin a·songrangoba namen mingsing minggama ineba Hek parakataha.
“Sohra-ko a·gilsak gimikon mingsing minggama aro gipin biaprangoni manderangde pangnan Meghalaya-kosa Sohra-o donga ine chanchitoka indiba uan iandakede ong·jachim. Uni gimin Sohra-ba district songako man·na krachongmota,” ine BJP MLA parakataha.