SHILLONG: Meghalaya a·doko gilja nokrangko re·baenggipa August 16 tarik dipet kulipiltaignok ine Sombar salo a·dokni Deputy Chief Minister aro Health & Family Welfare Minister Prestone Tynsong parakataha.
Iani bidingo kobor ra·timgiparangna talataniko on·angengon, dingtang dingtang district administration-rangoniko kobor ra·chengani ja·man aro dingtang dingtang dolrangoni mol·molanirangko man·soani ja·man a·dok sorkari, gilja nokrangko re·baenggipa August 16 tarik dipet kulipiltaina manchiangaha ine Deputy Chief Minister parakataha.
Sombar salo a·dokni Chief Minister Conrad K Sangma-ni dilanichi a·dok sorkari tom·e chanchirimangenba, a·doko gilja nokrangko kulipiltaina manchiangaha.
Tynsong-ni parakatani gitade, gilja nokrangko kulipiltaina on·engoba olakkianirango manderangni tom·bimongani bakgittamoni baksana batna man·jawa aro mondolini dilgiparangan niamrangko niroke ja·rikdilangna nanggen.
August 16 tarikni ja·man gilja nokrango biarangkoba ka·piltaina on·gnok indiba gilja nokrango manderangko sokachake jinma alanirangko dakna man·kujawa ineba Deputy Chief Minister parakataha.
Iani bidingo a·dokni Chief Secretary bakan niamrangko tarie jinmana u·iatgen ineba Tynsong parakataha.