SHILLONG: A·songni bang·bata a·dokrangon, aro Salgro Salaramni a·dokrango mangba bang·a bang·ja bading chiwalanirangko kulitokaha, indake ong·genchimoba Covid man·giparang bang·engkuani gimin Meghalaya Sorkaride bading chiwalanirangko kuliattokna gita skeljaenga gita nika.
A·dokona ong·rongbewal janggi tanganiko sokatbaani bidingo sing·anina aganchakengon, ong·enga obostarangko sorkari nigrikchengenga aro ta·raken ong·rongbewal janggi tanganiona sokbaatna nangnikenga ine Deputy Chief Minister, in charge Health Prestone Tynsong aganaha.
“Sabisi man·giparang bang·engkuaniko nigrikaton, changsano gimikkode kulidimatna man·jawa ine nikaha. Chinga ja·kuprakprak dake re·chakkatgen” ine aganan baksa Sorkariba, a·dokona ong·rongbewal janggi tanganiona ba normalcy-ona sokbaatna nangnikengaha, Pa Tynsong aganaha.
Indakeba nikatna man·a je, Meghalayao re·anggipa May 1 tarikonin restrictions ba champenganirangko ra·gatataha aro da·o bang·bata a·dokrangan bang·a bang·ja bading chiwalani aro re·a doanirangko kuliangtokaha, unomitingo, a·doko skanggipa COVID tikkako su·giparang da·o 46 percent ong·ahao mangba, chu·gimikko kuliatsrangnade A·dok Sorkari nangnikkujaenga.
Tikka su·aniko gong·rakatani bidingo sing·anina aganchakengon, ia bilsi September jaode a·dokni 70 percent manderangko tikka su·na gita Sorkari miksongenga ine Tynsong aganaha.
“A·doko champenganirangko ra·gattaina nangjana gita chingni miksonganide 100 percent ong·e manderangko tikka su·na re·chakkatanian ong·gen,” Health Minister aganaha.
A·doko COVID sabisiko simsakna cholija ine Sorkarini kosako, Opposition Congress dolni matnanggipana aganchakengon, manderang DHS, doctor, nurse aro Asha worker-rangko onchepe ra·na nangja, jemangan manderangko chel·chakna walang salang rakbee kamrangko ka·enga, Pa Tynsong aganaha.
Minggipin, bol 11 mang Advanced Life Support ambulance garirang ru·utgijan A·doko donggnok ine DHS (MI) Dr Aman War aganaha.
A·doko champengatanirangko chu·gimikde ra·galsrangkujawa: Tynsong
Date:
Share post:
