TURA: Garo Hills-o mingsa namen misilbegipa a·sel ong·anio, atchidaldal me·a bi·sa bakgitchak saksani sigimin manggisiko Sombar pringo ramasamo gale donangako Williamnagar-ni manderang nikaha.
Koborko on·ani gitade, ia bi·sani manggisiko Sombar pringo, Williamnagar jillani Dawa Gittingre jolo donggipa district jail a·palo maming chol ba·ra gri gale donangako manderang nikaha.
“Iani bidingo chinga pring 6:00 bajimango koborko man·soaha aro dolsa police-rang ua biapona re·ange am·sandianirangko dakaha. Ia bi·sa ja 5 ba ja 6-mang ong·gnok ine mitam manderang aganengoba chinga doctor-ni report-na sengengkua. Iani bidingo chinga mokordomako segataha aro dos dakgipa manderangko rim·na sandiengaha,” ine East Garo Hills a·jani Superintendent of Police (SP) Bruno A Sangma, kobor ra·timgiparangna parakataha.