TURA: West Garo Hills a·jao aro mongsongbate Tura jillani wilwilao COVID-19-ni tikako su·giparang komiengkua ine Sombar salo health official-rang parakataha.
District Maternity & Child Health Officer-ni u·iatani gitade, Tura jillani wilwilao bilsi 18-oni bilsi 44 ong·gipa manderang COVID-ni tikako su·giparang komiengkuani gimin August 7 tarikoni a·bachenge August 14 tarikona, bimingrangko segate tikarangko su·e ra·na man·na gita dingtang dingtang biaprango tikarangko su·angkuenga.
Ia biaprangara Matchakolgre UPHC, Sampalgre UPHC, Dobasipara UPHC, Babupara LGB School, District Maternity & Child Health Hospital, Holy Cross Hospital aro Tura Christian Hospital-rang ong·enga.
Sorkarini dongimin niamo pangchake COVID-ni tikarangko su·na gita private hospital-rangode gong 100/- ka·e ra·enga ineba DM&CH officer parakataha.
Indake ong·engon, an·tangtangni namgninasan ong·aigija an·tangtangni nokdang aro nokripengrangni namgninaba ia biaprangona re·ange an·tangtangko tika su·e ra·china gitaba district health official-rang, tika su·kugijagipa manderangko didiataha.
