TURA: Garo Hills-ni pilak non-adhoc skulrangnan Science Grant-in-aid-ko Science skigiparangni account gita chipatgija dingtang dingtang school managing committee (SMC)-rangni joint bank account gita chipatskachina All Garo Hills Non-Adhoc Secondary & Higher Secondary School Teachers Association (AGHNASHSSTA), a·dok sorkario dabiangaha.
Iani bidingo Meghalaya a·dokni Education Minister Lahkmen Rymbui-na sedoatengon, skangode ia skulrango science skigipa sakgnina, chong·motan Science aro Mathematics skigiparangna Science Grant-in-aid mingsanko on·engachim indiba re·anggipa July-ni 28 tariko West Garo Hills a·jani DSEO gital order-ko on·taiani ja·man, ia skulrango Science grant mingsanniko Science skigipa sakgnina on·anio neng·nikanirangko man·na a·bachengaha ine association parakataha.
Association-ni parakatani gitade, DSEO-ni gital ge·etanio, Science skigipani bank account-ko on·china gita skulni managing committee-rangna ge·etaniko on·ahachim aro iani a·selan da·o Science grant-in-aid mingsanchi Science skigipa sakgniko chalaianio neng·nikanirangko chagrongna nangtokengaha.
Ia niamko dingtangatani a·selan Science grant mingsanoniko Science skigipa saksanade tikatna neng·nikanirangko man·engaha ine janapatengon, gitcham niamkon ja·rikpiltaichina aro Science skigipa sakgninan apsan cholko on·china association, a·dokni Education Minister-ko didiataha.
