SHILLONG: Re·anggipa Mongolbar salo, Shillong songjinmani Laitumkhrah-o IED boma gopretanichi saknaa man·gipa manderangna indin sanna bananirangko on·china gita Civil Society Women’s Organisation (CSWO), a·dok sorkariko didiangaha.
Saljrakjrakon manderangni kamrangko ka·engmiting somoio bomako gopretahani gimin jegalatengon, ian ka·pongni kamko mesokani gitasa ong·aha ine CSWO-ni president Agnes Kharshiing aro general secretary Evangeline Thabah parakataha.
“Songsalo iandake manderangni tom·tome songdong a·chaaniko so·sojengjeng ong·atanina manderangna jegalgrimna nangchongmota. An·ching pilakan bobil dake chakatgipa dolrangna kene dongchajana gita ia bomako gopretanio jak donggipa manderangko sandianio pilakan bakrimaniko on·na nanga,” ine CSWO-ni dilgiparang parakataha.
Ia IED boma gopretani ja·man, Hynniewtrep National Liberation Council (HNLC) bobil dol, ia bomako gopretanio jak donga ine parakatahachim.
