TURA: South West Khasi Hills a·jao National Highway (NH) ramako tarienggipa Dhar Constructions company, Ranikor chiringo a·arangko gale chiringko nosto ka·enga ine United A·chik Youth Federation (UAYF) parakatenba, iani bidingo ta·raken ja·kuko de·china sorkariko didiataha.
UAYF-ni president Sanggra Marak-ni parakatani gitade, ia chiringo a·arangko galengani a·sel a·doko ro·batsranggipa Ranikor chiring aro chio donggipa na·tok-na·batrang nisiatako man·tokengaha.
“2018 bilsi dipetan ia company, Moheshkola gita Ranikor-oni Baghmara-ona dakanggipa NH ramako tarienga aro uamang ramako tarianio a·arangko chiringosa galengani a·selan ia chiring aro chio donggipa na·tok-na·batrang nisigalako man·engaha. Uamang a·arangko gipin biaprangoba galna man·achim indiba a·arangko ia chiringosa galskaenga,” ine UAYF-ni president, suk ong·gijaniko parakataha.
Indake ong·engon, iani bidingo nanga gita am·sandianirangko dakenba, ia chiringo a·a galaniko ta·raken champengatchina gitaba UAYF, a·dok sorkariko didiataha.
