Boma gopretanio jak donganina mande saksako rim·a

SHILLONG: Re·anggipa Mongolbar salo, Shillong songjinmani Laitumkhrah jolo IED bomako gopretanio jak donganina East Khasi Hills a·jani police-rang, kosako donge Hynniewtrep National Liberation Council (HNLC) bobil dolna kam ka·enggipa mande saksako rim·aha.
Police-rangni u·iatani gitade, ia mandeko police-rang, Shillong songjinmani biap damsaoniko rim·aha aro ia boma gopretanio jak donggipa gipin manderangkoba rim·na gita sandienga.
“Mongolbar salo IED bomako gopretanio jak donganina chinga mande saksako rim·aha aro gipinrangkoba rim·na gita chinga sing·sandianirangko dakengkua. Mikkang salrango chinga HNLC baksa jak donggipa gipin manderangkoba rim·gen,” ine police official parakataha.
Budbar attamo Assistant Inspector General of Police GK Iangrai-ni u·iatani gitade, skanggipa Laitumkhrah Police Station-o criminal case-ko segataha indiba ja·mano ia case-ko Shillong-ni Crime Branch Police Station-ona ra·jitangskaaha.
Mongolbar salo Shillong songjinmani Laitumkhrah bazar-o IED bomako gopretanichi me·chik saksako man·chape gimik mande sakgni saknaanirangko man·na nangahachim.