SHILLONG: Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko police-rangni so·ote galani bidingo jakgitele am·sandianirangko dakatchina gita Tham U Rangli (TUR) dol dabiangaha.
HNLC-ni gitcham general secretary-ko Sukrobar pringwalo, uni dongchakenggipa nokona re·ange so·otahachim ine nikna man·a.
Police-rangni u·iatani gitade, adita salrangna skang Shillong songjinmani Laitumkhrah-o IED bomako gopretanio jak dongani gimin police-rang uko rim·na uni nokona re·angahachim indiba ua police-rangko churichi chadrappangpilna jotton ka·ahani giminsa police-rang uko gochakna nangahachim.
Indake ong·engon, police-rangni agananiko sianggipa mandeni nokdang aro TUR dol jegalatenba, kakketko ma·sina man·na gita High Court judge-ni dilanichi independent inquiry-ko dakchina dabiangskaaha.
“Saksa sakgipinko so·otgrikani aro an·chi pari nikanirangara an·chingni songsalo tom·tome janggi tanganiko golmal ka·ani aro bilgriatani gita ong·enga,” ine TUR-ni dilgipa Angela Rangad parakatenba, ia a·selni bidingo kakketko ma·sina gita independent inquiry-ko dakna nanga ine dabiangaha.
Mandena on·gimin bilko pe·gipa niamrang, jekai Armed Forces Special Powers Act (AFSPA), Meghalaya Maintenance of Public Order Act aro Unlawful Activities (Prevention) Act gita dakgipa niamrangko TUR raken jegalangkugen ineba Rangad parakataha.
