SHILLONG: Je songrangon bilsi 18 batgimin manderangko matchote COVID-ni tikarangko su·manahachim uandakgipa dam 100 songrangna sorkari, gong lak 5 ka·e tangkako on·gen ine u·iataha.
Meghalaya a·dokni Chief Secretary MS Rao-ni u·iatani gitade, re·baenggipa August 31 tarikni gisepo je songrangon bilsi 18 batgimin manderangko tika su·a matchotchenggen, uandakgipa dam 100 songrangna sorkari, gong lak 5 ka·e tangkako on·gen.
Meghalaya a·doko COVID-19-ni batrikrikaniko champengna gita a·dok sorkari tika su·aniko bariatan baksana dingtang dingtang kamrangko ra·gatenga ineba Chief Secretary parakataha.
“Manderangni namgnina COVID-19-ni giproroaniko champengna gita songo noko manderangni kamko mittelpilna gita sorkari, MGNREGS baksa nangrime re·baenggipa August 31 tarikni gisepo tika su·mangimin dam 100 songrangna gong lak 5 ka·e tangkarangko on·gen aro ia tangkarangko Meghalaya Basin Development Authority (MBDA)-ni gita chame on·gen,” ine Chief Secretary parakataha.
Indake ong·engon, Health & Family Welfare department-ni dongimin nisan gita je songrangan tikarangko su·mantokahachim, uandakgipa songrangna da·o August-ni 15 tariko a·songni jakgitelani salko manianio district aro sub-division-tangtango mande ra·pilskaaniko dakanggen ineba Chief Secretary u·iataha.
