TURA: South Garo Hills a·jao donggipa Mindikgre Regional Unit-ni GSU president, Greneth Sangma aro uni ka·rimska Franchis R. Marak mang re·anggipa Sukrobar salo Pre-Independent Day run-ko Tura-o ong·atanichi covid sabisini jelrikrikaniko komiatna miksonge niam ra·gatgiminko pe·aha ine West Garo Hills Deputy commissioner Ram Singh aro gipin district sports officer-rangni kosako police-na FIR ka·doangaha.
South Garo Hills a·jani Garo Student’s Union (GSU)-ni dilgiparang, Constitutional Rights Forum-o pangchake a·jao sports event-rangko ong·atchina gita hukumko on·ahani gimin DC aro sports officer-rangni kkosako Tura police station-o FIR ka·enba mamla segatangchina ine police-rangko didiangaha.
“DC aro sports officer-rangni hukum on·anichi, mni Sukrobar salo New Tura-ni rama-sorok joljol sak ritchani ritcha manderang tom·dakbagipao social distancing dongja aro mask-rangko ganjaha ine uamangni jachipchanggipa noksao nikna man·aha, jeon district administration an·tangtangni social media gimiko watatgipao nikna man·achim,” ine GSU-ni dilgiparang sakgni matangataha.
Indake ong·engon, Deputy Commissioner Ram Singh, batanggimin chango a·dok sorkarini ra·gatgimin niamrango pangchake, jeon sports ba gipin kal·susaanirangko ong·atna man·gen ine hukum on·gimino pangchakesa ong·atahachim ine agan-talatna ine jotton ka·beahachim.
Iani bidingo jujaatanirangko man·engani gimin Ram Singh agan-talataniko on·engon, “Katsusaaniko ong·atgiparang sakantikon covid protocol-ko ja·rikchina gita didiataha. Katsusaaniko ong·atchengani somoio bang·batan bak ra·angako noksao nikenga. Uan minitsaba ong·jachim. Uandake bakko ra·pagiparang sakantian covid sabisina tikka su·giminrangsan bakko ra·china ineba didiatangkuaha,” ine agan-talataha.
