TURA: Re·anggipa Bristibar salo Garo Hills Autonomous District Council (GHADC)-ni Chief Executive Membor (CEM) Benedic R Marak, ma·mongni Union Tribal Affairs Minister Arjun Munda-ko Delhi-o grongenba, GHADC-na tangka paisani gita dakchakanirangko on·atchina didiangaha.
Union Minister-ko grongenganio CEM baksana CEM-ni chief adviser Akki A Sangma aro GHADC-ni executive membor I/c Agriculture Pramod Koch-ba dongpae bak ra·angaha.
“Tribal Affairs Ministry-oniko GHADC-na dingtangmancha tangka paisarangko chamatchina gita chinga Union Minister Arjun Munda-ko mol·molaha aro ua dakchakaniko on·na chingna ku·rachakataha,” ine Union Minister-ko grongeani ja·mano GHADC-ni CEM parakataha.
Iana skang GHADC-ni CEM, Housing & Urban Affairs-ni Union Minister of State Kaushal Kishore-koba grongeaha aro Delhi-o GHADC Bhawan-ko rikna nangengani gimin agangrikangaha. Iana agreba Garo Hills-ni pilak district headquarter-rango shopping complex-rangko rikani giminba GHADC-ni CEM, Union Minister of State baksa agangrikangaha aro ua an·tangni man·a gita dakchakanirangko on·atna ku·rachakataha ine u·iataha.
Indake ong·engon, Garo Hills-o dingtang dingtang namroro silroroani kamrangna tangka paisarangko chamatchina gitaba GHADC-ni dilgiparang, DoNER aro Cooperation-ni Union Minister of State BL Verma-ko gronge agangrikangaha ine u·iataha.
GHADC-na tangka paisani gita dakchakaniko on·china CEM, Tribal Affairs Minister-ko didia
Date:
Share post: