TURA: East Garo Hills-ni skotong songjinma Williamnagar Civil Hospital (WCH)-ni doctor saksa, jean South Garo Hills a·jani bilsi chu·ongkugijagipa me·chik bi·sako niam gri bi·sa galatanina uko rim·aha ine koborna parakataha.
Koborna u·iatani gitade, Williamnagar Civil Hospital-ni Dr. Dolan S R Marak-ko South Garo Hills a·jani police team Williamnagar-ona re·bae rim·eaha. Uni kamko adita salrangna skangonin Tura-ona apjitatako man·aha, indiba ua Tura-o an·tangni kamko ka·ekujaengachim.
“Doctor Dolan-ko Baghmara Women Police Station-o badi ka·gipao pangchake rim·aha aro uni kosako 21 POCSO Act-ni section-rang 376(2)(f)(n)/365/312/201/ 315 IPC R/W Sec 5(j)(ii)(l)(n), Medical termination of pregnancy Act-ni sec 23 aro sec 5(3)-o pangchake mamla segatangskaaha.
Obostao ga·akgipa bilsokkugijagipa me·chik bi·sako uni gumetang drae til·ekenba, uko an·o dongataha aro ua dosko donuna gita me·chik bi·sani gumetang aro uni ripeng Francis batanggimin Butbar salo me·chik bi·sako Williamnagar Civil Hospital-ona rimangdraenba oko gnanggipa bi·sako galdraatahachim.
Ua me·chik bi·sa, oko gnanggipa galani a·sel uni okrang namen saknaaha aro dondipgija an·chi ong·jringaha. Uandake da·o ua me·chik bi·sako apsan hospital-on sana-bananiko dakangenga ine koborna u·iataha.
Ia a·selni bidingo che·em che·em sandiroke niagaon, Dr. Dolan, bang·a bilsi chu·sokgijagipa me·chik bi·sarangni an·o donga bi·sarangko niam gri galatrongenga ine u·ina man·aha.
Uandake an·o donggipa me·chikrang bilsokkugijagipa ine ma·sigenchimoba, medical officer-rang mamingkoba ma·a-paarangna u·iatchenggija indakgipa kamrangko dongnue ka·rongna jotton ka·skaachim ineba koboro janapaha.
“Ia a·sel obostani bidingo chinga nambate, che·em che·em sing·sandianiko dakangkuenga,” ineba South Garo Hills a·jani SP agandapaha.
