SHILLONG: Sombar salo a·dokni Cabinet tom·e chanchirimangenba, Hynniewtrep National Liberation Council (HNLC)-ni gitcham general secretary Cheristerfield Thangkhiew-ko police-rangni so·otani bidingo judicial inquiry-ko dakatna manchiangaha.
Re·anggipa August-ni 13 tariko HNLC-ni gitcham general secretary-ko police-rangni so·otgalani ja·man, Shillong songjinmao aro mongsongbate Mawlai-Nongkwar jolrango songdongenggipa manderang jegalgrime, so·sojengjeng ong·anirangko nikna man·angahachim. Robibar salo, manderang ka·a ding·chaoenba, jinma re·jomanirangko aro police-rangni kosako jegalanirangko dakangtokahachim ine nikna man·a.
Indake ong·engon, HNLC-ni gitcham dilgipako police-rangni so·otani bidingo judicial inquiry-ko dakatenba, peace committee-ko songna gita sorkari manchiangaha ine u·iataha.
Koborko on·ani gitade, ia peace committee-ko a·dokni Deputy Chief Minister Prestone Tynsong aro sakgni Cabinet Minister-rang, chong·motan Hamletson Dohling aro Renikton Lyngdoh dilanggen aro uamang tom·tomaniko ra·bapilna gita kamrangko ka·dilanggen.
Shillong songjinmao obostarang namsrangkujaengani gimin curfew-ko Budbar pring 5:00 bajiona ra·gatangkugen aro internet-koba konta 24-na ‘off’ ka·e donangkugen ineba ia tom·anio Cabinet tik ka·angaha.
Obostarangko name nirokangna gita sub-committee-koba songgen aro sub-committee-ko a·dokni Chief Minister, Deputy Chief Minister aro Home Minister dilanggen ineba sorkari tik ka·angjolaha.