TURA: A·songo jakkalenggipa ku·sik mingantian gamchatgipa ong·ani gimin ku·sik mingantikon Indian Constitution-ni 8th Schedule ning·o ra·napna nanga ine Baroda University-ni gitcham English Professor aro Padmashree award-ko man·gipa Prof GN Devy aganaha.
Adita salrangna skang, North Eastern Hill University (NEHU) Tura campus-ni Garo aro English department-rang baksana A·chik Literature Society-ni nangrime ong·atanggipa google meet-o Prof Devy-ba bakko ra·e ia kattarangko aganaha.
A·songo jakkalenggipa ku·sikrangni gamchatgipa ong·ani gimin janapangengon, ku·sik mingantian dingtangmancha gun gnang ong·a aro ia ku·sikrangko tangkame rakkina nanga ine Sahitya Akademi-ni saksa Fullbright Scholar aganaha.
Prof Devy-ni aganani gitade, India a·songo jakkalgipa ku·sikrangkoba bilsi 100 batpile dingtang dingtang oikorrangko jakkalesa seahani gimin ia ku·sikrangara namen gamchatgipa ong·a.