TURA: Assam a·doko songdongenggipa A·chikrang, ru·uta bilsirangonin Garo Autonomous Council (GAC)-kosa on·china dabitokengani gimin All Garo Hills Joint Actiom Committee (AGHJAC)-ni membor-rang, Assam Assembly-ni Deputy Speaker Dr Numal Momin-ko grongenba, Garo Development Council (GDC)-ni pal GAC-ko on·china didiangtokaha.
Assam a·doko songdongenggipa A·chikrangni jelbra jelsuani lak 8-na batani gimin Assam a·dokni A·chikrangna kamrangko dingtang kange donna nangengani giminba AGHJAC-ni membor-rang, Dr Momin baksa agangrikangjolaha.
Assam Assembly-ni Deputy Speaker-ko grongenio dongpae bakko ra·anggipa AGHJAC-ni membor-rangara, AGHJAC-ni adviser Roger Benny A Sangma, AGHJAC-ni convenor Balkarin Ch Marak, GSU Eastern Zone-ni president Saljrang Tengrik R Marak, GSU HQ-ni president Zikku Balgra N Marak, GSMC Garobadha unit-ni chairman Ryan Ch Marak, GSU northern zone-ni general secretary Walseng N Sangma, FAF North Garo Hill-ni president Jagir M Sangma, GSU Western Zone-ni president Tengsan M Marak aro GSU Chibinang unit-ni general secretary Kengkrong B Sangma ong·achim.
Ia tom·anio Assam Assembly-ni Deputy Speaker Dr Momin, AGHJAC-ni membor-rang baksa agangrikengon, ua an·tangba saksa A·chik dilgipa ong·e Assam-o songdongenggipa A·chikrangni namgnina chanchigipa ong·a aro ua mikkangchi jatni namgnina kamko ka·anggen aro GAC-ko man·e on·na krenggen ine ku·rachakaniko on·ataha.
Indake ong·engon, Mongolbar salo AGHJAC-ni membor-rang, Delhi Police-ni Special Commissioner Robin Hibu-koba New Delhi-o donggipa uni office-o grongeaha aro a·songni mongsonggipa bakrango, mongsongbate Delhi songjinmao salgro salaram jolni manderangko mikchepe kragija dakgipa kamrangko ka·rongengani gimin agangrikangaha ine u·iataha.
Adita salrangna skang, Haryana-ni hospital-o sianggipa Rosy Sangma aro Delhi-ni Hotel Greenpark-o ong·na kragija dake sianggipa Samuel Sangma-ni bidingoba AGHJAC-ni membor-rang, Delhi Police-ni Special Commissioner baksa agangrikangaha aro ia A·chik chadambe sakgnini siani a·selrangko ta·raken am·sandienba sianggipa mande sakgnini nokdangrangna kakket bichalko on·china didiangaha.
