TURA: Ja·manchake koborko man·soani gitade, re·anggipa Sonibar attamchibara, South Garo Hills a·jani Siju jolo donggipa Nokatgre songo nok te·sako bon·pile wa·al kamgopaha.
Kobor on·timgiparangni u·iatani gitade, ia nokara saksa Noben C Marak minggipa mandeni nok ong·achim aro ia nokko wa·al kamani somoio noko mande darangba dongjaenba, nokni bosturang gimikkon kamgoptokaha.
Da·o dipet ia nokko wa·al kamani chong·mot a·selko tale ma·sikujaengoba, bijoli kamsotani a·selsa ia nokko wa·al kamgopahakon ine chanchichiptokenga.
Indake ong·engon, ia nokko wa·al kamgopani a·sel nokdangni manderang neng·nikanirangko chagrongna nangtokengani gimin ia nokdangna an·tangtangni man·a gita dakchakanirangko on·china Garo Students Union (GSU) Siju regional unit-ni dilgiparang didiataha.
