SHILLONG: Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko so·ote galanio jak donggipa sipairang aro official-rangko kam ra·galchina gita Shillong songjinmani Mawlai jolo songdongenggipa manderang dabiangtokenba, ia official-rangko ra·galkujaskal, tom·tomaniko ra·bapilna gita sorkarini songe on·gipa peace committee-o bakrimna jechaktokaha.
Mongolbar salo Mawlai jolni dilgiparang, NGO-rang aro chadambe dolrang, Mawlai-o donggipa Mawdatbaki Indoor Stadium-o jinma tom·aniko ong·atangenba, ia a·selni bidingo chanchirimangaha aro HNLC-ni gitcham dilgipako so·ote galanio jak donggipa police-rangko suspend ka·kujaskal sorkarini songe on·gipa peace committee-ko ra·chakna gita jechaktokaha.
Seng Samla Mawlai Pyllun-ni general secretary Samran Syiem-ni kobor ra·timgiparangna parakatani gitade, HNLC-ni gitcham dilgipa Cheristerfield Thangkhiew-ko ka·saninggija dake so·otgalani gimin Mawlai jolo songdongenggipa manderang suk ong·tokjaenga aro uko so·ote galanio jak donggipa police-rangko kamoniko ra·galchina nangniktokengachim.
“Uni gimin chingni jong-ada Cherish T Syiem-ko so·ote galanio jak donggipa police-rangko kam ra·galkujaskal chinga ia peace committee-ko ra·chakna man·kujawa,” ine Syiem parakataha.
Da·o dipet Shillong songjinmani Mawlai jolrango police patrolling-ko aro sipai dolrangko donatkujachina gitaba dilgiparang, a·dok sorkario dabiangaha.
Syiem-ni parakatani gitade, Robibar walo, CRPF sipairang, ia jolrango songdongenggipa manderangko aro manderangni gam-jinrangko nisie galahani gimin bang·bata manderangan sipai dolrangni kosako ding·chaoe dongtokengkua aro da·o dipet ia jolrango sipai dolrangko donatgenchimode so·sojengjeng ong·piltaiani cholrang dongengachim.
“Uni gimin manderangni gisikrang ka·sinkujaskal ia jolrango police-rang patrolling-rangko ka·kujachina aro da·o dipet ia jolrango police dolrangko donatkujachina chinga nangnikenga,” ine Syiem parakatenba, ia jolrango obostarangko nirokna gita jolni dilgiparangna bilko on·skachina gita sorkariko didiangaha.
Mawlai Nongkwar-o donggipa CRPF camp-ko jagittamni gisepon gipin biapona apjitangchina gitaba jolo songdongenggipa manderang, a·dok sorkario dabiangtokaha.
Indake ong·engon, Robibar salo police-rangni silchidareko ra·e katgipa chadamberangkoba ta·raken silchidareko on·pilchina gita jolni dilgiparang mol·molataha.
“Silchidare ra·e katgipa chadamberangni kosako maming ja·kuko de·jawa ine chief minister ku·rachakaniko on·manaha. Uni gimin ia silchidareko chingona ra·bae on·china ba je biapoba donangchina chinga mol·molenga. Silchidare ra·e katgipa chadamberangni bimingko chinga parakjawa indiba bano silchidareko donenga, uko chingna see u·iatchina chinga mol·molenga,” ine Mawlai jolni dilgiparang parakataha.