NEW DELHI: HNLC bobil dolni gitcham dilgipa Cheristerfield Thangkhiew-ni police jako so·ota man·ani ja·mano Shillong songjinmao kajia golmal a·bachengan baksa, Home Minister Lahkmen Rymbui-ba an·tangko home portfolio-oniko neng·takatchina kam watani chittiko on·ani bidingo NPP-chi dilenggipa bakrime rikenggipa MDA sorkari aditan jingjengaha, indiba sorkari begruaonade sokangjawa gita nikenga.
“Meghalayao Assembly election-rang ong·na da·o bilsisa adha-ba ong·ja, chinga sorkari baksa bakrimaoni bakande ong·katjawaha” ine saksa a·gipi UDP dilgipa aganaha, je dolan MDA baksa bakrimgipa dolni gisepo gnigipa dal·batgipa party ong·engachim. Dingtang dingtang jajaatanirangko chagronggenchimoba, regional party-rangni bakrime rikgipa sorkarini gisepo ru·utbate tangbanggiparangoni dolsa ong·enga ineba ua aganaha.
Uamangni party dilgipa Lahkmen Rymbui-ni kam watani bidingo sing·anina aganchakengon, ua Ministry-onide ong·katja, Home portfolio-oniko an·tangko neng·takatna agana aro uakoba da·odipetode Chief Minister Conrad Sangma ra·chakkuja, ua aganchakaha.
Unomitingo, mikkang election-ba UDP, NPP-mingan bakrimangaikugen ine sing·gipade UDP dilgipa aganchakjaha, “Bilsisa adha-de politics-ode namen bakrobegipa somoi ong·enga, mamingkoba aganna man·kuja” ineba ua aganaha.
Congress-ni tangchapil·baani bidingo maming chinko nikjaengani gimin, UDP bakrimaoni ong·katna chanchijaenga. Congress, Meghalayao seat ge·sani ja·man ge·gipinko gimaatroroenga, aro gital MPCC President-kon seokna bilsokjaenga ineba ua aganaha.