SHILLONG: Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko so·otanio jak donggipa police-rangko kam dontongatchengchina dabitokengon, ia a·sel bidingo sorkari, judicial inquiry-ko dakna committee-ko songmanaha aro inquiry report-ko man·ani ja·manosa sorkari, report-o pangchake ja·kuko de·anggen ine Budbar salo, a·dokni Chief Minister Conrad K Sangma parakataha.
Budbar salo, Mawlai jolko dilenggipa manderang, a·dokni Chief Minister Conrad K Sangma, Deputy Chief Minister Prestone Tynsong, Cabinet Minister Hamletson Dohling aro sakgipin Cabinet Minister Renikton Lyngdoh-ko grongenba, HNLC-ni gitcham general secretary Cheristerfield Thangkhiew-ko so·otanio jak donggipa police-rangoni kamoniko ra·galchina, Mawlai jolrango ma·mongni sipai dolrangko donatjachina, internet-ko on·piltaichina, curfew-ko chu·gimik ra·galchina aro Mawlai jolo donggipa CRPF camp-ko gipin biapona apjitangchina didie memorandum-ko on·angahachim.
Tom·a matchotani ja·mano kobor ra·timgiparangna talataniko on·angengon, Mawlai jolo donggipa dingtang dingtang dolrangni dabianirangko sorkari knatime ra·rikaha aro nangani kri kamrangko ka·anggen ine Chief Minister parakataha.
Cheristerfield Thangkhiew-ko so·otanio jak donggipa police-rangko kam dontongatchina dabienggipani gimin janapatengon, judicial inquiry-ni report-ko man·ahaon, report-o pangchake ja·kuko de·anggen ine Chief Minister parakataha.
Shillong songjinmao aro mongsongbate Mawlai jolrango tom·tomaniko ra·bapilna man·na gita sorkari baksa bakrime kamko ka·china gitaba a·dokni Chief Minister, ia tom·anio Mawlai Town Dorbar (MTD)-ni dilgiparangko didiataha.
Shillong songjinmao maming so·sojengjeng ong·ani dongdapjana gita sorkari, re·anggipa August-ni 15 tariko police-rangni silchidareko ra·e katgipa chadamberangni kosako maming ja·kurangko de·jawa ineba ia tom·anio a·dokni Chief Minister, ku·rachakaniko on·ataha.
Tom·tomaniko ra·bapilna kamko ka·dilna gita sorkari, peace committee-ko songe on·ahaoba Mawlai Town Dorbar-ni dilgiparang da·o dipet ia committee-o bakrimaniko on·na jechakangskaaha.